Beynəlxalq təşkilatlar Mehman Hüseynovla bağlı hakimiyyətə çağırış edib

Norveçin "İnsan Hüquqları Evi" Fondu (Human Rights House Foundation) video-bloger Mehman Hüseynova qarşı polisin "amansız rəftarı”nı pisləyib. Hüquq müdafiə təşkilatı Azərbaycan hakimiyyətini hadisəni tez zamanda və ətraflı araşdırmağa və təqsirkarları məsuliyyətə cəlb etməyə çağırıb.
 
"Turan” İA bu barədə təşkilatın Tvitterdəki mikrobloqunda yaydığı bəyanata istinadən yazıb.
 
Eyni zamanda, ATƏT-in KİV azadlığı üzrə xüsusi nümayəndəsi Arlem Dezir də Mehman Hüseynovun dekabrın 27-də polis tərəfindən saxlanılması və döyülməsi haqqında məlumatlardan narazılığını bildirib.
 
"Hakimiyyəti bu məsələni tez və ətraflı araşdırmağa və təqsirkarları məsuliyyətə cəlb etməyə çağırıram", - deyə o, "Twitter”dəki mikrobloqunda yazıb.
 
Mehman Hüseynov dekabrın 27-də axşam saatlarında reper Pasterin (Pərviz Quluzadə) həbsi ilə bağlı etiraz aksiyası zamanı polis tərəfindən saxlanılıb. Özünün dediyinə görə, o, şəhər kənarına aparılıb və amansızca döyülüb.
 
DİN-nin mətbuat xidməti M.Hüseynovun "razılaşdırılmamış aksiya keçirdiyinə və vətəndaşların istirahətini pozduğuna görə" saxlanıldığını təsdiq edib, amma döyülmə faktını təkzib edib.