Bakı meriyası Bəxtiyar Hacıyevin piket istəyinə cavab verdi

Bakı Şəhər İcra Hakimiyyəti (BŞİH) Bəxtiyar Hacıyevin martın 2-də quruma ünvanladığı 5 mart saat 10:00-da Konstitusiya Məhkəməsinin qarşısında piket keçirməklə bağlı müraciətinə cavab verib.

 

BŞİH cavab məktubunda müraciətin “Sərbəst toplaşmaq azadlığı” haqqında qanunun 5-ci maddəsinin I və II hissələrinin tələblərinə cavab vermədiyini bildirib:

 

“Mərkəzi Seçki Komissiyası tərəfindən Milli Məclisə seçkilərlə əlaqədar bəzi seçki məntəqələrində seçicilərin iradəsini müəyyənləşdirməsinə imkan verməyən və Seçki Məcəlləsinin tələblərinə zidd olan hallar araşdırılıb, həmin seçki məntəqələrində seçkilərin nəticələri ləğv edilib. Məsələ ilə bağlı toplantı keçirmək yox, aidiyyatı üzrə müraciət etmək tövsiyə edilir”.

 

BŞİH qeyd olunanları nəzərə alaraq planlaşdırılan piketin keçirilməsini məqsədəuyğun hesab etməyib.

 

Bununla bağlı Bəxtiyar Hacıyev açıqlamasında, "seçkilərin nəticələrinə etiraz üçün Konstitusiya Məhkəməsinin qarşısında piketlə bağlı BŞİH-ə xəbər vermişik, tövsiyyə veriblər. Prezident deyir, "narazılar varsa, səslərini çıxarsınlar", Eldar Əzizov deyir ki, "icazə vermirəm". Günah bizdədir ki, sizin bizə icazə verəcəyiniz mövqedə qalmağınıza icazə vermişik", - deyə qeyd edib.