“Azəristilik” qış mövsümünə 29 milyon borcla gedir - Vətəndaşlar narahatdır

Azərbaycan Dövlət Neft Şirkətinin (SOCAR) Azəriqaz İstehsalat Birliyinin İctimaiyyətlə əlaqələr şöbəsinin rəisi Ceyhun Səfərov "Report"a müsahibəsində Azəristiliktəchizat ASC-nin Azəriqaz İB-yə borc məsələsinin bu il də gündəmdə olduğunu açıqlaması vətəndaşlarda qış mövsümündə mənzillərin istiliklə təchiz edilməsi ilə bağlı narahatlıq yaradıb.
 
Şöbə rəisi deyıb: 
 
"Azəristiliktəchizat ASC ilə bu il iyulun 26-da imzalanan razılaşma protokolunda iyulun 1-i tarixinə təbii qazdan istifadəyə görə "Azəriqaz” İB-yə olan borc qalığı 33 mln. 525 min 480 manat göstərilib. Oktyabr ayının 1-nə istifadə edilən qaza görə debitor borc isə 28 mln. 913 min 497 manat təşkil edir. Bu ilin 9 ayı üçün hesablanan borc 21 mln.429 min 129 manatdır. Bu günə qədər borc öhdəlikləri 19,11% yerinə yetirilib", - deyə qurum rəsmisi bildirib. 
 
Bu da haqlı olaraq vətəndaşlarda sual yaradıb. Görəsən qurumun "Azəriqaz"a olan borcu qış mövsümündə istilik təchizatında problem yaratmayacaq ki?
"Azəristiliktəchizat" ASC-nin Abonent və Müştəri Xidmətlərinin rəisi Rafiq Əliyev Qaynarinfo-ya bu narahatlıqla bağlı sualı cavablandırarkən bildirib ki, bu borc vətəndaşlara problem yaratmayacaq:
 
"Qurumlar arasında borc məsələsi əvvəllər də vardı. Bu borclar hökümət tərəfindən tənzimlənir, ona görə vətəndaşlarımız bundan əziyyət çəkməyəcək. Qışa hazırlığa qalanda isə 2019-2020-ci illər payız-qış mövsümünə hazırlıqla əlaqadar olaraq Azəristiliktəchizat ASC tərəfindən təsdiq edilmiş tədbirlər planına uyğun olaraq bütün zəruri tədbirlər həyata keçirilib”.
 
Lakin iki qurum arasında bu borc məsələsi 2015-ci ildə də baş vermiş hadisənin təkrarlanmasına səbəb olmayacaq ki? O vaxt da vətəndaşlar bu borc üzündən istilik təchizatından məhrum olmuşdular. Belə ki, "Azəristiliktəchizat” Azəriqaz Səhimdar Cəmiyyətinə olan borcunu ödəmədiyi üçün şəhər təsərrüfatı noyabrın 15-dən qış rejiminə keçsə də, "Azəristiliktəchizat” evlərə istilik vermək üçün "mavi yanacaq” əldə edə bilməmişdi.