ABŞ nümayəndəsi: Amerikalı məhbuslar azadlığa buraxılmasa İranla nüvə sazişi mümkün olmayacaq

ABŞ-ın nüvə danışıqları üzrə aparıcı nümayəndəsi bazar günü Reuters agentliyinə bildirib ki, Tehran girov saxladığı dörd ABŞ vətəndaşını azad etməsə, Birləşmiş Ştatların İranla 2015-ci ildə imzalanmış nüvə sazişini xilas etmək üçün İranla razılaşması çətin olacaq.

Robert Malli ABŞ-ın uzun müddətdir ki, İranda saxlanılan 4 nəfərlə bağlı məsələnin nüvə danışıqlarından ayrı olduğu mövqeyini təkrarlayıb. Bununla belə, o, onların azad edilməsinin nüvə razılaşması üçün ilkin şərt olduğunu söyləməyə bir addım da yaxınlaşıb.

"Onlar ayrıdırlar və biz onların hər ikisini təqib edirik. Amma deyim ki, dörd günahsız amerikalı İran tərəfindən girov saxlanılarkən nüvə sazişinə qayıtmağı təsəvvür etmək bizim üçün çox çətindir" - deyə, Malley Reuters agentliyinə müsahibəsində deyib.

Son illər İranın elit İnqilab Keşikçiləri Korpusları əsasən casusluq və təhlükəsizliklə bağlı ittihamlarla onlarla ikili vətəndaşlığı olan insanları və əcnəbini həbs edib.

Hüquq qrupları İranı diplomatik təsir rıçaqları əldə etmək üçün əsir götürməkdə günahlandırır, Qərb dövlətləri isə uzun müddətdir Tehrandan siyasi məhbus hesab etdikləri vətəndaşlarını azad etməyi tələb edir.

Tehran siyasi səbəblərə görə insanların saxlanmasını inkar edir.

Malli İrandakı ABŞ, Britaniya, Fransa, Almaniya, Avstriya və İsveç məhbuslarının azad edilməsi və onlar azad edilmədən heç bir nüvə razılaşması əldə edilə bilməz tələbi ilə Vyanada aclıq aksiyası keçirən 77 yaşlı keçmiş ABŞ diplomatı Barri Rozenlə birgə müsahibəsində danışıb.

Rozen 1979-1981-ci illərdə İranda girov böhranı zamanı saxlanılan 50-dən çox ABŞ diplomatından biri olub.

Dörd ABŞ vətəndaşı arasında 50 yaşlı iranlı amerikalı iş adamı Siyamak Namazi və onun atası 85 yaşlı Bağır də var ki, onların hər ikisi “düşmən hökumətlə əməkdaşlıqda” ittiham olunurlar.

Namazi hələ də həbsdədir. Atası 2018-ci ildə tibbi səbəblərə görə azadlığa buraxılıb və sonradan onun cəza müddəti endirilib.

Ata Namazi artıq həbsdə olmasa da, ailə vəkili deyib ki, onun İranı tərk etməsi faktiki olaraq qadağan edilib.

Digərləri isə britaniyalı 66 yaşlı ekoloq Morad Təhbaz və 57 yaşlı iş adamı Emad Şərgidir.

 

Amerikanın səsi